غرور الحب .

غرور الحب

ياللي الغرام سابنا وجه خبط علي بابك

أوعي الغرام يغرك وينسيكي أحبابك

أصل الغرام مدرسة وفيها الكل يتعلم

فن الغرام مشكلة بيوقعني قدامك

درب الهوي خلاني بعد البكم بتكلم

جه المدرس يسال جاوبته بلسانك

ومشيت ورا قلبي في كل طريق بتالم

حكم عليا الهوا طول العمر خدامك

نظرة عينيكي بتسحر قلبي وعيوني

لو مرة رمشك رفع بيقع الكل في غرامك

لمسة ايديكي بتشفي من القلوب الوان

لو مرة لمست ايديا بطب قتيل اعتابك

وخدك الودي زهرة وعالبستاني بتسلم

لو حد قرب منك ما بيخرجكش من بابك

جبينك الغالي في كل طريق بينور

وقدك العالي مبين كل اسرارك

من حسنك الفتان يبات الكل متحير

يوصف محاسنك ويغزل منه اشعارك

لو كت نجوم الليل من صبري بتتكلم

كانت بتنزل من العالي علشانك

كانت تقولك سهرت الليل من حسنك

كانت تبوحلك بألم الكل في عذابك

لو كان بأيدي أجبلك م السما نجمة

واغزل بأيدي منها ليكي خلخالك

صورتك قصادي في كل كلمة بكتبها

اختار كلامي وافصل منه احوالك

سهر الليالي عشانك مش بعدلها

أصل في هواكي لقيت الكل بيشارك

وكنت بسهر وطول الليل أنا أتمني

أفوز بقلبك وكل الناس تيجي تبارك

واتحقق الحلم وانا قاعد أنا وانت

في وسط أهلي وحبايبي وعيلتي وجيرانك

من كتر فرحي كتمت الفرح جوايا

لحد منهم بيحسدني علي جمالك

الليلة ليلتي وكل الناس جاية تهني

بيقولو خت القمر يا ريتنا في مكانك

علاء عبدالحسيب نجم