وجود كل شخص في حياتنا فارق بس بدرجات

*"وجود كل شخص في حياتنا فارق بس بدرجات."*

" أنا مي عندي 20 سنة كلية آداب، قسم فرنساوي، كنت رايحه الكلية و أنا بقول لنفسي:  " امبارح ضحكت كتير مع الشلة و كالعادة خايفة ليومي يبقىٰ آخره نكد." 

يومي كان ماشي مظبوط و قمر لحد ما شوفت اللي عكّر دمي، المعيد اللي اتخرج السنة اللي فاتت، هو مش وحش هو مغرور في نفسه حبتين، و ده سمّي و موتي إن حد يعمل نفسه روش حتّىٰ أسألوا الشلة. 

دخلت قاعة المحاضرة، و بعد مرور ثلاث انتهت أخيرًا، دي المحاضرة الوحيدة اللي في الأسبوع اللي بتاخد تلات ساعات، ماهو علىٰ شان الدكتور رخم برده، آه هو نفس المعيد اللي عكّرلي مزاجي الصبح ، بدايق جدًا من المحاضرات الطويلة، بتفكرني بدرس الثانوية اللي مضطرة أقعد غصب عني و كإني بتعاقب علىٰ ذنب في الدرس. 

* كنت خارجة من المحاضرة و سمعت اسمي بصوته: "آنسة مي"! 

إيه ده هو عرف اسمي منين؟ ثواني هو اسمي حلو كده ليه! 

بصيت ليه بثبات:" نعم يا دكتور؟ "

الدكتور: "ماكنتيش مركزة ليه في محاضرة النهاردة؟"

أبغي أقول لك علىٰ شان عكّرت مزاجي الصبح أمّا شوفتك بس استحي، 

رديت عليه: "لأ أبدًا يا دكتور سيف، أنا كنت مركزة!" 

سيف: " طيب كنت بتكلم عن إيه النهاردة؟ "

أول ما قالي كده ماكنتش عارفة أتصرف إزاي لإني فعلًا ماكنتش مركزة أصلًا، بس أسكت لأ طبعًا، لازم أتفلسف علىٰ شان أخرج من موقفي الزبالة ده! 

قولت له: "كنا بناخد النهاردة فرنساوي." 

أغبىٰ جملة ممكن شخص يقولها و هو في قسم فرنساوي، ما هو ده الطبيعي يعني و مال هناخد إيه في القسم ده فيزياء مثلًا! 

لقيته بصلي و قالي: "نعم!" 

كنت فاكرة هيهزقني بس ضحك و قالي: " و مال إحنا هناخد إيه في القسم يعني؟! "

خوفت منه، ثواني أنت بتضحك يا سبحان الله كنت فاكراك كئيب علىٰ طول يا باشا و الله! 

رديت عليه: "طيب عن إذن حضرتَك!" 

و أنا خارجة لقيته بيتكلم بنبرة جادة من غير ضحك: " المحاضرة الجاية تكوني مذاكرة من أول محاضرة لآخر محاضرة، مفهوم يا آنسة مي، و إذا لقيتك مش مركزة تاني هخرجك بره المحاضرة. "

* إيه ده هو بيتحول و لا إيه؟! رديت بصوت مهزوم: " مفهوم "

كنت خارجة و أنا كارهاه زيادة عن اللزوم، و مال ضحك الأول ليه؟ بكرهه، آخر شخص كنت أتمنىٰ يشوفني في الحالة دي علىٰ شان الأسئلة الكتير، أخويا ما هو معايا في نفس الجامعة،كان جاي عليا و قال لي: "مالك فيه إيه؟ حد مدايقك في الجامعة؟" 

رديت بالنفي: "لأ أنا بس تعبانة شوية من الحر. " 

أخوها بضحك : " يا فرهوودة، لأ و لسه يا ما هتشوفي حر و زهق، عمالة تقولي عايزة أدخل الجامعة، عايزة أدخل الجامعة اشربي بقا. "

روحت البيت و كلمت الشلة، كنت هنام بس مروة هتقتلني لو ما دخلتش بإحترام لنفسي كده و حكيتلها. أصلها رخمة و بتحبنا أوي. 

بعتلها مسچ: " فاتحه ليه لحد دلوقتي؟ "

مروة: " هكون بتشقط ما تحترمي نفسِك، كنت مستنية نخلص في الجروب، و كنت هنام، و قدام بعتيلي مسچ يبقىٰ فيه شيء، احكي باحترام احكي، و بعتتلي إيمو هيفصل ضحك. 

جيت أكتبلها لقيتها بتقولي استني أرن عليكِ علىٰ شان نعرف نهزق بعض حلو في الكول! 

حكيتلها كل حاجة و كان تعليقها المستفز: "طيب اهدي شوية، أكيد بيحبك. و ضحكت."

قولتلها: " بقا كده، أنا غلطانة إني جيت و حكيتلك، كنت هقفل السكة في وشها بس لقيتها بتقولي: عارفة لو قفلتي السكة هفتح أنا دماغك بكره، أصلها حاجة غريبة رقم واحد: الدكتور ده بيهين أي حد في المحاضرة قدام الكل عادي، اشمعنا يعني استنىٰ أما المحاضرة خلصت و قال لك!

طيب بلاش دي: ضحك، ده أنا كمروة مش مصدقة إن كائن زي ده يضحك، لأ و كمان واخد باله منك، الموضوع مش طبيعي علىٰ فكرة. "

رديت عليها: "أولًا علىٰ شان أنا بنت و باين عليا إني مش زي الباقيين ثم إنه مش بيهزق بنات أصلًا، كل اللي بيهزقهم شباب.

مروة: "طيب نتقابل بكرة، و نشوف الموضوع ده بعد ما نخلص محاضرات، رز بلبن!"

= "خلاص يا مروة تمام، و فكرينا نعدي علىٰ توأمي نقعد معاها شوية يا رزلة من أسبوعين ما تلمنيناش كده، و يلا نصلي القيام و ننام علىٰ شان صلاة الفجر."

مروة: " أحبك و أنتِ شطورة و متدينة كده، يا بختك يا سيف، قصدي يا نصيبها."

="قومي يا مروة نصلي، خلي عندك شوية دم."

 ضحكنا وقفلنا، خلصت صلاة القيام و قبل ما أنام بقول لنفسي: " أكيد مش رأي مروة خالص يعني!"

*صحيت الصبح و النهاردة أخويا مارحش معايا، يعنى روحت لوحدي و طبعًا مش هترحم من نظرات مروة اللي هتبقىٰ بترخم عليّا بيها! 

روحت و عملت نفسي ناسية الموضوع، 

مروة: "إيه يا ميدو إيه أخباركِ النهاردة كده، طمنيني عليكِ؟"

= "الحمدلله يا ميرو، بطلّي إسم ميدو دي هتفضحيني في الكلية!"

مروة: "جرا إيه، أنتِ هتكبري عليا ولا إيه، إن ما خليت توأمك أدبيتِك يا أداب يبقىٰ بحق!"

= "إيه ده كله! و بعدين نوجا بتحب توأمها ياختي هتدافع عني قصادِك."

مروة بغمزة: "طيب إيه بقا؟!" 

="بتغمزي ليه! "

مروة: "أنتِ عايزة تفهميني إنك مش بتحبيه؟!" 

=" أنتِ بتقولي إيه يا مروة، اخس عليكِ، و مال لو مش بحكيلِك عن كرهي ليه! "

مروة: "يعني بتتكلمي عنه طول الوقت حتّىٰ لو كره، فهو شاغل بالِك، و فرحتِك أما سيف عرف اسمِك، و كمان دلوقتي متوترة و مصدومة من كلامي!" 

رديت بتوتر: "مروة، أنتِ عارفة إني مش بتاع الحاجات دي، و..." 

قاطعتني مروة: " علىٰ أساس إني هسيبِك تعملي حاجة غلط، قومي من وشي يا مي. "

= "مش قصدي، بس ماينفعش أنا بكرهه أصلًا." 

مروة:" يلا علىٰ شان نخلص المحاضرات اللي عندنا، علىٰ شان هنفوت علىٰ نوجا قالت: إن محمد في الشغل، و الحمل مبهدلها، كملت بضحك و بصراحة كده أنا بيني و بينِك هستغل ده و هخليها تتوحم عليّا "

ضحكت علىٰ كلامها، خلصنا محاضرات و طبعًا نوجا ماجتش الجامعه النهاردة لإنها تعبانة شوية. 

="نوووووووجا، توأمي اللي واحشني. "

نجاة: "لأ باين ياختي إني واحشاكِ، أصلًا الإهتمام مش بيتطلب!" 

مروة و هي هتموت من الضحك: "يابنتي دي هرمونات الحمل، و كمان الكلام ده لمحمد مش لينا." 

نجاة: " بطلي رخامة أنتِ كمان، عملتوا إيه في الجامعة من غيري؟ "

مروة: "أنا عن نفسي طول الوقت بفكّر في البيبي اللي جوا بطنِك، من الآخر بقا لازم أقولِك سر!" 

*اتصدمت من كلامها أكيد مش هتقول عن سيف هتلبسني فيه و أنا بكرهه ده رخم زيها أصلًا بس هي صحبتشي حبيبتي! 

لحقتها و رديت عليها: "سر إيه يا مروة، اتخطبتي!" 

نجاة: "نعم، ده اللي هو إزاي؟" 

قلبت عليها الترابيزة، خبطتني علىٰ دماغي و بصت لنجاة و قالت: " سيبك من الهبلة دي، أنا مخططة آجي هنا كتير في الفترة دي علىٰ شان تتوحمي عليّا، اكمني قمرين! "

فصلنا ضحك أنا و نجاة عليها و هي حاطة رجل علىٰ رجل و محمد جوز نجاة دخل! 

طبعًا هي مش واخدة بالها بس إحنا فاصلين ضحك. 

مروة: "بتضحكوا علىٰ إيه، بتتريقوا طيب تمام أنا ماشية" 

*لسه بتلف لقيت محمد في وشها قالت بصوت عالي: "يادي الكسفة يا حازم! يلا يا مي اتأخرنا، هنجيلِك وقت تاني، و هنكلمك واتس و ديو برده." 

روحنا و جه الليل و أنا تايهة، كمان الإمتحانات قرّبت، و بقيت بركّز في كل المحاضرات، كنت خارجة من الجامعة لقيت حد بينادي عليّا بإسمي! ببص لقيته هو سيف، من ساعة ما الناصحة قالتلي كتر التفكير فيه إعجاب، و أنا بقيت أتوتر أما أشوفه! 

= "نعم يا دكتور!"

سيف: "هو أخوكِ مجاش الجامعة ليه النهاردة؟ "

="مافيش يا دكتور، مشغول شوية. "

سيف بتوتر: "آه، طيب ممكن رقمه معلش محتاجه في حاجة ضروري." 

= "خير يا دكتور" 

سيف: " لأ خير، اطمني ده علىٰ موضوع البحث و كده. "

كنت متوترة بس هديت أما كان الموضوع بعيد عني! اديته الرقم و في الليل أخويا نادالي: "مي" 

="إيه، فيه إيه؟! "

أخويا: "أنتِ وقفتي النهاردة مع سيف!" 

رديت بتوتر: "لأ مش كده، هو طلب رقم تليفونك علىٰ شان البحث!" 

اطمنت إن الموضوع عدّىٰ علىٰ خير، بعد الإمتحانات بأربعة أيام، 

بابا: "مي" 

= "نعم يا بابا. " 

بابا: "فيه عريس جاي ليكِ، أخوكِ عارفه و بيقول إنه محترم. " 

*للحظة لقيت نفسي سرحت في سيف، رخامته و هو بينطق اسمي و المرة الوحيدة اللي ضحك فيها و بعدين اتحول، لكن استسلمت للواقع و رديت: "اللي تشوفه يا بابا."

*جهزت و لبست دريس نبيتي مع طرحة طويلة شبيهة بالخمار و كنت قمر يعني! و جه ميعاد الرؤية الشرعية.

الصوت:"آنسة مي، أخبار حضرتِك إيه."

*لوهلة حسيت إنه صوته بس قولت إن مش ممكن يحصل و تجاهلت شعوري. رديت بخجل: "الحمدلله بخير و حضرتَك؟" 

الصوت: "حضرتي بخير، هو ممكن تبصيلي بعد إذنِك!" 

للحظة حسيت برعشة مش عارفه مصدرها، لكن كنت ماسكة طرف الفستان من كتر التوتر و عيني باصة في الأرض، حاسة إني قربت خلاص أعيط،  بصت له بهدوء: "سيف! قصدي دكتور سيف!" 

سيف: "أول مرة أسمع اسمي بصوتك، و طلع حلو تستاهلي عليه إمتياز." 

قولت في نفسي نعم أنت غبي يابني، أو متحوّل حاجة من الإتنين! 

= "حضرتَك بتعمل إيه هنا؟" 

سيف: "رؤية شرعية، و شوية هيكون فيه زغاريد، يبقىٰ بعمل إيه! إذا كنتِ عايزة تعرفي عاملتك بقسوة ليه وافقي!"

استغربت من جرائته، و قولت لنفسي ثواني بس هو فعلًا موجود! عاااا هاتولي مروة هي اللي قالت إنه هيعمل كده!

= "هصلّي استخارة، و بابا هيرد علىٰ حضرتَك"

كنت فرحانه أوي و مش عارفة ليه! معقول ده كله علىٰ شان يصوني و ييجي البيت من بابه زي ما عمل، لأ و بيغازل كمان!

عدت فترة و بابا بلغه الموافقة،

يوم الخطوبة كان يوم مبهج بصراحة، معايا أختين مروة و نوجا و البيبي برده، و أهلي، و شخص صاني لحد ما دبلته بقت في إيدي.

سيف: "أنا قولتلك إذا وافقتي هقولك علىٰ سبب قسوتي."

= "بس أنا ماوافقتش علىٰ شان كده، أنا وافقت علىٰ شان صليت الإستخارة و اطمنت، و بابا موافق عليك." 

سيف و هو مش مصدق الكلام أصلًا: "المهم، أنا عاملتك كده علىٰ شان أنا حسيت من أول يوم بإعجاب بيكِ، أما حاولت أبعد عنِك عرفت إن الحل قُربك و إن ده هيكون وقت ما آجي البيت و أطلبِك من باباكِ، حاولت أخفي مشاعري عنك، بس لقيت نفسي مش هقدر أفكر فيكِ أكتر من كده غير و أنا واخد خطوة بجد، إني أخطبك." 

*كان نفسي أقول له كات هايل يا فنان، بس من صدمتي بكلامه ماقدرتش أرد عليه، يعني هو بيحبني ده كله و أنا مش فاهمة، أو يعني.... أنا توهت منه، بس إيه القمر ده.. استغفر الله. 

بصتله و قولتله: "حضرتَك هتقسىٰ عليا زي أيام الجامعة؟" 

سيف: " ماضمنش، بس أنتِ مش بتهوني عليا، وقت ما قسيت عليكِ إنك تذاكري كنت بفضل سهران أنا كمان زي ما أنتِ بتكوني سهرانه، علىٰ شان أعاقب نفسي علىٰ القسوة. "

= "إذن، بداية مبشرة" 

سيف: "ينفع أقول لكِ حاجة؟" 

اتوترت بس قولتله: "أتفضل" 

سيف: "هحاول علىٰ قد ما أقدر أثبت لِك إنك اخترتي صح، و إني هكون لِك داعم و أنتِ هتكونيلي أحلامي." 

*ده طلع حنيّن و ليه في المحن، بس محنه حلو الصراحة، يالهوي إيه اللي بقوله ده! 

رديت بخجل عليه: " بإذن ﷲ أكون مصونة بيتَك يا سيف. "

سيف: "احم، إيه الجمال ده، قولي اسمي تاني كده!" 

=" سيييف من أولها كده!"

سيف: " يا أحلىٰ صوت نطق بإسمي يا ناس. "

قولت في نفسي: والله أنا اللي اسمي بقا حلو يوم ما سمعته منك."

#مروة_صبري