بقلم هدير اسامة سيد
وانا قاعدة سرحانة وبفكر فحالي
وإحساس الوجع ماليني
مش قادرة انسي ولا استوعب اللي جرالي
لقيت الدموع نزلت من عيني
لقيت صحابي دخلوا عليا
ازيك ازيك عاملة اية
اية ده مالك بتبكي ليه
لساني اتشل مبقتش عارفة اقول اية ولا اية
الكلام اتلغبط جوايا
اصل دموعي مليانة خبايا
الهم مصحبني ومش عايز يسبني
والحزن بقا مقيم معايا
في قلبي مليون حاجة وجعاني
مش عارفة اقول ولا اخبي
سؤالهم لخبط كياني
اتكلم ولا اسيب حزني يفضل مستخبي
ومن كتر ما انا بعاني مش قادرة انطق
الوجع تقيل اوي علي لساني
وبقيت في بحر العذاب بغرق
وخايفة بعد ما اتكلم رد الفعل يكون معلش
ساعتها هلوم نفسي اني قولت ومخبتش
لان وانا بحكي هبقى بتقطع
ما هو مش سهل اني احكي وجعي ومتألمش
وفالاخر الاقي كلمة باردة
تزود وجعي متقللش
لقيت صراع بين قلبي وعقلي
واحد عايز يحكي عشان يلاقي اللي يهون
والتاني خايف اللي بوجعه يستهون
وكل ده كان كلام مع نفسي
اصل مش من طبيعتي ابين ضعفي ويأسي
كرروا السؤال تاني
قررت احكي اية اللي بكاني
بصيت في عيونهم وقولت
بتسألوني ببكي لية
ببكي علي عمر ضاع علي قريب باع
علي سنين جريت علي صحاب بعدت
علي حاجات كتير حلوة قالتلي الوداع
ببكي علي ايام مليانة هم
علي جروح مش بتتلم
ببكي علي قلب مشفش حب
علي ناس مليانة سواد وكدب
بببكي من كتر الالم والخدااع
ببكي علي ضحكة مش لاقياها
علي فرحة غايبة ومش عارفة معاد لقاها
ببكي علي صوت محبوس مخنوق بالعياط
علي حياتي اللي اوحش من الكابوس
والوجع اللي عمال يزداد
ببكي علي حاجات فيا بقت مش موجودة
علي اشتياقي لنفسي ايام ما كانت مبسوطة
ببكي علي نفسية اتدمرت
علي ملامحي اللي اتغيرت
علي نفسي اللي بمعنى الكلمة
تعبت من كتر ما عيطت
ببكي علي الوردة اللي كانت فالبستان
و فجأة دبلت وبقا لونها بهتان
بقا مجني عليها والجاني هو الزمان
كانت بتتعامل بطيبة وإنسانية
مكنتش تعرف أنهم اختفوا
من قلوب البشرية
ببكي علي حالي
اللي نشفت عليه دموع عينيا
ببكي من اللي شوفته ولسة بشوفه
ببكي علي قلبي اللي خايف من بكرا
مش عارفة مستقبلي اية ظروفه
ولا عارفة اخلي الماضي مجرد ذكري
ببكي من مليون حاجة وجعاني
مش لاقيا ليها دوا
على نفسي اللي بتعاني والقلب اللي من الجراح انكوا ببكي علي ظلم زماني لياو الاحلام اللي طارت فالهوا
ببكي علي حياتي
والضحكة اللي غايبة ومش ناوية الرجوع
علي الالم اللي موجود
فكل سطر ف حكاياتي
و علي عيوني اللي مليانة اهات ودموع
ببكي علي زهرة شبابي اللي دبلت
ومبقاش ليها فروع
ببكي بصوت ساكت مش مسموع
ببكي بصوت ساكت مش مسموع
0 تعليقات
اكتب تعليقا لنكمل مسيرتنا وندعم المزيد.