قصيدة أصعب إحساس

بقلم هدير اسامة

الضغوط كسرت ضهري 

والتفكير هيشلني 

مستنيه الفرحة تنداهلي 

والاقي حد اصيل يحبني 

بحاول اعدى واقول تمام 

بس قلبي بينزف جروح وآلام

بمشي اكلم نفسي وسرحانة فالهموم 

مبقتش عارفة مين الظالم ومين المظلوم

مش قادرة اصدق اللي بيحصل 

ولا ان القريب بسهولة يكسر 

وان اللي من لحمه و دمه فراقي عنه ولا يأثر

طول حياتي بتباع 

وكإني مخلوقة بس للوداع 

الكل ساب واتخلى 

وسابولي الوجع والقهرة 

و سابولي الحوجة 

والحوجة يا قلبي مرة 

خلاص بقيت لوحدي

مفيش ضهر اتسند عليه 

ولا حد اقوله انا ايه اللي تاعبني 

مفيش حضن ادارى فيه 

ولا حد يطبطب ويشيل عني 

عايزة انعزل عن الدنيا 

ولا اكلم حد ولا حد يكلمني 

كرهت الشوارع والبيوت 

حاسة اني محبوسة في تابوت 

عايشة لكن روحي حرفيا بتموت

بقولها بكل حرقة حسبي الله 

حسبي الله في كل اللي اذوني 

وسببولي وجع عمري ما هنساه

و في كل اللي سببولي جرح 

هيكمل معايا باقي الحياة 

أصل الضربة لما تيجي من القريب 

ولا ميت سنة تنسيك 

هتكمل حياتك وتدعى النسيان

 واصغر موقف هيصحى الوجع فيك

وتصعب عليك نفسك 

ودموع الصعبانية نار تكويك 

أصل اصعب احساس فالدنيا 

ان نفسك تصعب عليك 

اصعب احساس فالدنيا 

انك تحس ان محدش باقي عليك